[
06 Fevral 2009 15:17 ]
Ankara – APA. Türkiyə hökuməti Azərbaycan Ali Hərbi Təyyarəçilik Məktəbində təlim-təhsilə dəstəklə bağlı iki ölkə arasında imzalanmış protokolu təsdiqləyib.
APA-nın ANKA agentliyinə istinadən verdiyi məlumata görə, hökumətin qərarı bu gün “Resmi Gazete”də (“Rəsmi Qəzet”) yayımlanaraq qüvvəyə minib.
2008-ci il martın 14-də Türkiyə Silahlı Qüvvələrinin Baş Qərargahı ilə Azərbaycan Müdafiə Nazirliyi arasında imzalanmış protokola əsasən Azərbaycan Ali Hərbi Təyyarəçilik Məktəbində təlim-təhsil və komandanlıq sistemi Türkiyə Hava Hərb Məktəbindəki sistemə uyğun şəkildə qurulacaq. Protokola əsasən 4 illik təhsil zamanı müdavimlərə liderlik, idarəetmə, komandanlıq bacarıqları, vəzifə məsuliyyəti, cəsarət, fədakarlıq, dürüstlük, eləcə də vətən, bayraq və peşə sevgisi aşılanacaq. Məktəbdə tədris polkovnik, podpolkovnik və mayor rütbəli Türkiyə hərbçilərinin iştirakı və tövsiyəsi ilə aparılacaq.