Ana səhifə > Siyasət >
Diaspor
Bu gün Türkiyənin Gürcüstandakı səfiri Ləvənd Murad Bürhan Marneulidə olub
[
15 Oktyabr 2009 19:16 ]
Marneuli. Nizami Məmmədzadə-APA. Türkiyənin Gürcüstandakı səfiri Ləvənd Murad Bürhan azərbaycanlıların kompakt şəkildə yaşadığı Marneuli rayonunda olub. APA-nın Gürcüstan bürosunun məlumatına görə, səfir Marneuli rayonunun Sabirkənd və Hacıisakənd məktəblərinin əsaslı təmirdən sonra açılışında iştirak edib. Məktəblərin təmirini TİKA-nın Gürcüstan nümayəndəliyi həyata keçirib. Tədbirdə səfir Ləvənd Murad Bürhan, Gürcüstan prezidentinin anası Qiuli Alasaniya, Kvemo-Kartli bölgə qubernatoru David Kirkitadze, TİKA-nın Gürcüstan nümayəndəliyinin koordinatoru Selim Kuş çıxış edərək məktəbliləri və pedaqoji kollektivləri yeni istifadəyə verilmiş, hər cür şərait yaradılmış məktəbin açılışı münasibətilə təbrik ediblər.
TİKA-nın Gürcüstan nümayəndəliyinin koordinatoru Selim Kuş APA-ya bu ölkədə 1994-cü ildən fəaliyyət göstərdiklərini deyib: “Mən 6 aydır bu vəzifəyə təyin olunmuşam. Burada çalışmağımızda məqsədimiz təhsil sahəsində çatışmazlıqları aradan qaldırmaqdır. İndiyədək bir neçə kəndlərdə yeni məktəblər tikib və bəzilərini də əsaslı təmir etmişik. Bu gün Sabirkənd və Hacıisakənd məktəblərinin təmirdən sonra istifadəyə verilməsində iştirak etdik. Biz bundan sonra da bu bölgədə işlərimizi uğurla davam etdirəcəyik“.
Türkiyənin Gürcüstandakı səfiri Ləvənd Murad Bürhan APA-nın “Türkiyə-Ermənistan sərhədlərinin açılmasına münasibətiniz”sualını cavablandırmaq istəməyib. “Bu, yeni bir siyasətdir. Üzr istəyirəm, bu barədə danışa bilmərəm. Biz qardaşlığı, dostluğu inkişaf etdirmək üçün əlimizdən gələni edəcəyik. Mən buraya TİKA-nın layihəsini həyata keçirmək üçün gəlmişəm. Bu mövzuda nə qədər istəyirsiniz, danışa bilərəm. Biz Gürcüstanda Türkiyə-Gürcüstan əlaqələrini möhkəmləndirmək və genişləndirmək üçün əlimizdən gələni əsirgəməyəcəyik”.
Tədbirdə Gürcüstan təhsil və elm nazirinin birinci müavini İrina Kurtadze, nazirliyin regional koordinasiya departamentinin rəisi Aleksandr Juruli, Gürcüstan parlamentinin deputatı Azər Süleymanov, Marneuli rayon İcra Hakimiyyətinin başçısı Zaza Dekonoidze və digər rəsmi şəxslər iştirak ediblər.
|
Forex
