Bakı. Aynur Vəliyeva - APA-ECONOMICS. Azərbaycanın rabitə və informasiya texnologiyaları naziri Əli Abbasov bu gün Belarusun Yüksək Texnologiyalar Parkının (YTP) və Dövlət İnformatika və Radioelektronika Universitetinin rəhbərləri ilə görüşüb.
RİTN mətbuat xidmətinin rəhbəri Müşfiq Əmirov «APA-ECONOMICS»ə bildirib ki, Bakıda keçiriləcək İKT sahəsində I Azərbaycan-Belarus biznes forumunda iştirak etmək məqsədilə Belarus nümayəndə heyətinin tərkibində Azərbaycanda səfərdə olan Belarus YTP-nin direktoru Valeri Sepkalo ilə görüşdə nazir forumun iki ölkə arasında İT sahəsində əməkdaşlığa yeni təkan verəcəyini və münasibətləri daha yüksək səviyyəyə çatdıracağını bildirib.
Ə.Abbasov qonağa son illər Azərbaycanın İKT sahəsindəki uğurlarından danışıb və dünyada maliyyə böhranı ilə yadda qalacaq 2009-cu ildə Azərbaycan iqtisadiyyatının, xüsusən də İKT sahəsinin stabil artım nümayiş etdirdiyini xüsusi vurğulayıb. Nazir qeyd edib ki, son illər ərzində Azərbaycanın İKT sahəsi ümumdünya artım tempini bir neçə dəfə geridə qoya bilib.
Ölkədə həyata keçirilən layihələr barədə danışan RİTN rəhbəri Azərbaycanda Regional İnnovasiya Zonasının yaradıldığını, bu layihənin perspektivləri və onun icrasının faydası barədə ətraflı məlumat verib. Bu istiqamətdə o, Azərbaycanın təşəbbüskarı olduğu Trans-Avrasiya Super İnformasiya Magistralı (TASİM) layihəsini də qeyd edib. Bildirilib ki, dünyanın 20-dən çox ölkəsini əhatə edəcək sözügedən layihənin həyata keçirilməsi nəticəsində regionda “rəqəmsal fərqliliyi” aradan qaldırmaq və informasiya axınlarına sürətli çıxış əldə etmək mümkün olacaq.
Öz növbəsində V.Sepkalo Ə.Abbasova YTP layihəsi barədə ətraflı məlumat verərək qeyd edib ki, Belarus bu istiqamətdəki təcrübəsi ilə bölüşməyə hazırdır. Qonaq Azərbaycan və Belarus arasında İKT sahəsi üzrə əməkdaşlığın möhkəmləndiriləcəyinə və gələcək inkişafına əminliyini bildirib.
Bu gün Əli Abbasov Belarus Dövlət İnformatika və Radioelektronika Universitetinin (DİRU) rektoru Mixail Batura ilə də görüşüb. Görüş zamanı RİTN başçısı istənilən ölkənin iqtisadi potensialının inkişafı üçün yüksək ixtisaslı kadrların hazırlanmasının vacibliyini qeyd edib və Azərbaycanda bu istiqamətdə həyata keçirilən proqramları diqqətə çatdırıb. Ölkədə təhsil sahəsinə və yüksək ixtisaslı kadr hazırlığına böyük diqqət və vəsait ayrıldığını bildirən nazir bunların həm azərbaycanlı tələbələrin tanınmış xarici tədris ocaqlarında təhsil almasına, həm də ölkədə təhsil səviyyəsinin artırılmasına yönəldildiyini qeyd edib.
Bu gün qonaq olduğu Azərbaycan Texniki Universitetindən (ATU) məmnun qaldığını bildirən M.Batura forum çərçivəsində rəhbərlik etdiyi DİRU-nun ATU ilə əməkdaşlıq haqqında saziş imzalamaq niyyətində olduğunu vurğulayıb.
APA İnformasiya Agentliyi iqtisadiyyat şöbəsində 2 (iki) vakant yerə işçi qəbulu elan edir. İddiaçılar minimum 3 illik iş təcrübəsinə və iqtisadi biliklərə malik olmalı, Azərbaycan və rus dillərini sərbəst bilməlidirlər. Xarici dil bilənlərə üstünlük veriləcək.
Əlaqə telefonu: 596-33-57/58
Əlaqələndirici şəxs: Vüqar Mustafayev
Email: economics@apa.az