Bakı. Laçın Sultanova - APA. Moskva və Bütün Rusiyanın patriarxı Kirill Azərbaycanın Rusiyadakı səfiri Polad Bülbüloğlunu anadan olmasının 65 illiyi münasibətilə təbrik edib. APA-nın Moskva patriarxlığının mətbuat xidmətinə istinadən verdiyi məlumata görə, təbrikdə deyilir: “Müstəqil Dövlətlər Birliyi məkanında sizi yalnız istedadlı müğənni, bəstəkar və aktyor kimi yox, həm də Rusiya-Azərbaycan əlaqələrinin möhkəmlənməsinə böyük töhfə verən müdrik dövlət xadimi kimi tanıyırlar. Sizin yaradıcılığınız musiqi və kinematoqrafiya tarixində xüsusi səhifədir. Diplomatik fəaliyyətiniz isə Rusiya ilə Azərbaycanın münasibətlərinə müsbət dinamizm verir, dinlərarası və millətlərarası dialoqun inkişafına xidmət edir”.